"Садар самууныг сурталчилсан, биеэ үнэлэлтийг зохион байгуулсан 28 фэйсбүүк хуудсыг хаалгахаар болсон"

ЦЕГ-ын Урьдчилан сэргийлэх хэлтсийн ахлах мэргэжилтэн Д.Бүрэнбаатар “Манай улсад биеэ үнэлэх, садар самууныг сурталчлах хуулиар хориотой. Ийм төрлийн гэмт хэрэг өмнө нь гудамж талбайд үйлдэгддэг байсан бол одоо саун массажны газарт эсвэл цахим орчинг ашиглаж биеэ үнэлэх асуудал нэлээд газар авсан.

Эрүүгийн цагдаагийн албанаас өнгөрсөн хугацаанд нийт 18 бүлгийн 29 холбогдогчтой 76 хохирогчтой 23 хүн худалдаалах гэмт хэргийг илрүүлсэн. Дээрх 76 хохирогчоос 22 нь насанд хүрээгүй хүүхэд байсан.

Тухайлбал, Эрдэнэт хотоос насанд хүрээгүй гурван охин Улаанбаатар хотод ажил хөдөлмөр эрхлэхээр ирснийг Х гэгч этгээд тэдгээр охины анхаарал халамж, хараа хяналт сулыг далимдуулж, зорчих эрхийг хязгаарлаж хүчээр биеийг нь үнэлүүлж, бэлгийн мөлжлөг явуулж байсан гэмт хэргийг илрүүлсэн.

Мөн насанд хүрээгүй эмэгтэйчүүдийг цахим хаягаар нь удаа дараалан олзлон хүчээр биеийг нь үнэлүүлж байсан гэмт хэргийг Эрүүгийн цагдаагийн албанаас илрүүлэн дараагийн шат руу шилжүүлээд байна.

Сүүлийн үед цахим орчинд садар самууныг сурталчилсан бичлэг тавих үйлдэл их байна. Охид эмэгтэйчүүдийн санамсар болгоомжгүйгээр алдсан бичлэгийг олзолж, дарамтлах хэлбэрээр хүчээр биеийг нь үнэлүүлж байсан гэмт хэргүүд илрээд байна.

Эрүүгийн цагдаагийн албанаас садар самууныг сурталчилсан, биеэ үнэлэлтийг зохион байгуулсан 28 фэйсбүүк хуудсыг хаалгахаар Харилцаа холбооны зохицуулах хороонд албан ёсоор хандсан.

Түүнчлэн бид садар самуун, биеэ үнэлэлтийг сурталчлах гэмт хэргийг илрүүлэх зорилгоор төрийн тус байгууллагуудтай хамтран нийслэлийн дэн буудлуудыг шалгах арга хэмжээ авсан. Энэ хүрээнд нийт 42 дэн буудлыг хаалгах саналыг Мэргэжлийн хяналтын газарт хүргүүлээд байна.

Бидний ажигласнаар, насанд хүрээгүй хүүхдүүд маш олон бичлэг хийдэг болсон байна. Түүнийгээ хэн нэгэнд алдаж, эргээд дарамтад орж, бэлгийн мөлжлөгт өртөх аюул учирч байна.

Тиймээс эцэг, эхчүүд хүүхдүүдийнхээ цахим орчинд тавих хяналтаа сайжруулах шаардлагатайг анхааруулж байна” гэв.

"Насанд хүрээгүй хүүхдэд бэлгийн мөлжлөг явуулсан бол 12-20 жил хорих ялаар шийтгэдэг"

Үргэлжлүүлэн “Насанд хүрээгүй хүүхдийг өөрийн эрхшээлдээ байлгаж, бэлгийн мөлжлөг явуулсан бол Эрүүгийн хуулийн хүрээнд 12-20 жил хорих ялаар шийтгэдэг.

Хууль хяналтын байгууллагаас анхааруулж хэлсээр байтал эцэг, эхчүүдийн бага насны хүүхдэдээ тавих хараа хяналт сул байна. Мөн бага насны охид цахим орчинд ямар ч хяналтгүйгээр орж байна.

Тиймээс эцэг, эхчүүдийг хүүхдэдээ анхаарал тавьж, ярилцаасай гэж хүсэж байна. Тэдэнд тавих анхаарлаа сайжруулснаар хүүхдийнхээ ирээдүйг аврах, тэднийг ямар нэг гэмт хэргийн золиос болохоос урьдчилан сэргийлнэ" хэмээн онцлов

Эх сурвалж: ikon.mn

 

 

Энэ МЭДЭЭ танд таалагдаж байвал Like хийгээрэй. Танд баярлалаа.
Манай САЙТ танд таалагдаж байвал Like хийгээрэй. Танд баярлалаа.

Сэтгэгдэл үлдээх

(*) - Заавал бөглөх.

  • Шинэ мэдээ