Өвөл ирэхгүй юм шиг хавар нь сонгуулиар амьсгалж, зун нь найр, наадам хөөгөөд алга болсон монголчууд гэнэтхэн есдүгээр сар ойртонгуут сэхээ авсан аятай хамаг л замаа хааж, боогоод засч эхэлсэн. Өнөөдөр хотын  гол ачаалал авдаг зам хаагдсны улмаас Эрдэнэтчүүд түгжрэл бөглөрөл дунд бухимдаж байна.Зуун айлын урьд хэсгийн тодруулбал Эрдэнэт хотын урд хэсгээр дайран өнгөрдөг улсын чанартай А1001 авто замыг өргөтгөх ажил эхэлж тодорхой хугацаанд замыг хаахаар болсон. Гүйцэтгэгч компаний тухайд  графикт хугацаагаараа бол 10 дугаар сарын 30-нд бүрэн дуусгаж хүлээлгэн өгөх ёстой гэж гэдйисэн ч  Улсын төсвийн хөрөнгөөр барьж буй А1001 авто замын өргөтгөлийг хугацаанаас нь өмнө ашиглалтад оруулах үүргийг аймгийн удирдлагууд өгчээ.

Тус замын асфальт бетон хучилтын ажил 9 дүгээр сарын 9-ний өдрөөс эхлэх бөгөөд  10-р сарын 1-ний өдрийг хүртэл уг авто замыг хэсэгчлэн хааж ажлыг үргэлжүүлэх чиглэл өгсөн Гэсэн ч өнөөдөр зам нээгдээгүй ажлын гүйцэтгэл бүрэн дуусаагүй байна. Тус авто замын гүйцэтгэгчээр ажиллаж буй “Жавхлан харгуй” ХХК-д  энэ сарын 15 ны өдөр гэхэд замаа нээх үүргийг өгсөн ч тэд хуульд заасан хугацаандаа өгнө гээд гэдийхчих эрхтэй.

Сургууль цэцэрлэг, албан газруудын ажил ид оволзож байгааг хэлэх үү, зам засвараас болж, Эрдэнэтчүүд  багагүй бэрхшээл тулгарах боллоо. Зам засварын ажлаа хавар эхэлчихгүй хэмээн иргэд бухимддаг ч яг үнэндээ жилийн жилд намар нэг юм додомдсон болоод цас унахаас өмнө амжихын нэрээр “нүглийн нүдийг гурлаар хуураад” өнгөрдөг нь нууц биш.  Халуун зунаар биш, хүйтний ам наашилж, хөхүүрийн ам цаашлах цагаар ажлаа эхэлдэг нь зам засварын компаниудын  нэг баширхан арга бололтой юм.  Бүгдээрээ ч биш байх л даа, зарим нэг нь тендерт ялсан ч  мөнгө нь орж ирэхгүй, түүнээс болоод  зам засварын ажил нь оройтдог гэдэг. Бүх зүйл хоёр талтай гэдэгчилэн асуудлууд бий. Харин зарим нэг нь эртхэн зам тавих гэхээр бороо усанд амархан  эвдэрчих гээд өвлийг далимдуулж, замаа тавиад хатаах биш, хөлдөөх арга хэрэглэдэг гэж учир мэдэх хүмүүс ярьдаг. Зам тавьсан компаниуд жилийн баталгаа өгдөг болохоор  аль болох намар оройхон замаа тавиад өвөл нь хөлдөөж, дараагийн зун нэг жилийн нас даасан гээд мөнгөө буцаагаад авчихдаг гэх ч олны яриа ортой ч юм шиг.Чадвартай боломжтой гэгдэх ганц нэгхэн компанид найддаг Эрдэнэтчүүдийн хувьд зам шинэчлэх ажилд өрсөлдөгч сайтай компаниудыг сонгон шалгаруулах эрэлт хэрэгцээ бий болжээ.Хэсэгхэн тэсчихвэл сайхан замтай болно гэж тайвшруулаад өнгөрөх бус зуны дэлгэр цагт хийдэг жишиг тогтоочихвол сайнсан. Юутай ч зам завсарын ажил хурдан дуусаасай...

Сэтгүүлч
Т.Атарбаяр

Энэ мэдээ танд ямар санагдав?

0

0

0

0

0

0