Баяр наадмаар  нийтийн хоол, худалдаа, үйлчилгээ,  сугалаа ажиллуулах иргэн, аж ахуйн нэгжийг бүртгэх цахим бүртгэл энэ сарын 29-нд эхэлнэ. Энэ талаар ЗДТГ-ын Хөгжлийн бодлого, төлөвлөлт, хөрөнгө оруулалтын хэлтсийн дарга С.Даваадорж дараах мэдээллийг өглөө. 

Нийтийн хоол, худалдаа үйлчилгээ, сугалаа эрхлэгчид Орхон аймгийн Erdenet.mn албан ёсны цахим хуудсанд нэвтэрч "Баяр наадмын үeэр ажиллах нийтийн хоол үйлдвэрлэл эрхлэгчдийн цахим бүртгэл",  "Баяр наадмын үeэр ажиллах худалдаа, үйлчилгээ, сугалаа эрхлэгчдийн цахим бүртгэл" гэсэн цэснээс сонголтоо хийнэ. Ингэхдээ асуумжаа  үнэн зөв бөглөж, бүрдүүлсэн бичиг баримтаа  хавсаргана.

     Нийтийн хоолны чиглэлээр хоол үйлдвэрлэл, үйлчилгээ эрхлэгчийн хүсэлт, холбогдох утасны дугаар,иргэний үнэмлэх, аж ахуйн нэгжийн гэрчилгээний хуулбар,тогоочийн мэргэжлийн үнэмлэхийн хуулбар,тогооч, ажилчдын урьдчилан сэргийлэх үзлэг шинжилгээний дэвтрийн хуулбар, ХХААГ-ын Бүртгэл мэдээллийн санд бүртгэгдсэн хоол үйлдвэрлэл, үйлчилгээ  эрхлэгчийн бүртгэлийн хуудас зэрэг байна. 

Худалдаа, үйлчилгээ, сугалаа явуулахад бүрдүүлэх матeриал аж ахуйн нэгж, иргэний хүсэлт, утасны дугаар, ААН-ийн гэрчилгээний хуулбар, иргэн бол иргэний үнэмлэхийн хуулбар, эрүүл мэндийн шинжилгээний дэвтрийн хуулбар /Зөвхөн хүнсний худалдаа эрхлэгчид/, Тоглоом, фото зургийн үйлчилгээ эрхлэгчид хүсэлтээ Баян-Өндөр сумын ЗДТГ-ын 207 тоот, худалдаа үйлчилгээ хариуцсан мэргэжилтэнд гаргана. /Цахимаар бүртгэхгүй/. 

Цахим бүртгэл 06 дугаар сарын 29-ны 10:00 цагт нээгдэж, 16:00 цагт хаагдана.  Мөн хүнсний аюулгүй байдлыг хангах чиглэлээр улсын байцаагчийн 11 заалт бүхий  зөвлөмжийг бэлтгэж, иргэн аж ахуйн нэгж байгууллагад хүргүүлнэ.  Худалдаа, үйлчилгээний чиглэлээр ажиллах иргэн, аж ахуйн нэгж байгууллага сонгогдсоны дараа ирэх сарын 4-нд хүнсний аюулгүй байдал, галын аюулгүй байдал болон холбогдох чиглэлээр сургалт зөвлөгөө өгнө” гэлээ. 

Сэтгүүлч
Т.Атарбаяр

Энэ мэдээ танд ямар санагдав?

0

0

0

0

0

0