Орхон аймгийн 49 иргэн өнөөдөр өргөө цагаан гэртэй боллоо. Аймаг, сумдын Засаг дарга нарт хандаж гэр хүссэн 200 гаруй иргэний өргөдөлд нөхцөл байдлын үнэлгээ хийсний үндсэн дээр амжиргааны баталгаажих төвшнөөс доогуур орлоготой, гал, усны гамшигт өртөж орон гэргүй болсон, өндөр настай гээд 49 иргэнд гэр олгов.
Аймгийн ИТХ-аас төрийн дэмжлэг туслалцаа шаардлагатай иргэддээ зориулж 200 сая төгрөгийг баталсан. ИТХ-ын стратеги төлөвлөгөө, Засаг даргын үйл ажиллагааны хөтөлбөрийг хэрэгжүүлэх ажлын хүрээнд ийн тус бүр нь 4,081,632 сая төгрөгийн үнэтэй өргөө цагаан гэрийг олголоо.
Жил бүр төрийн дэмжлэг шаардлагатай 40-50 иргэнд гэр олгох ажлыг зохион байгуулдаг. Ингэхдээ аймгийн Нийгмийн халамжийн зөвлөл, сум, багийн амжиргааг дэмжих зөвлөлөөр хэлэлцэн шийдвэрлэдэг юм. Аймгийн ИТХ-ын дарга Д.Мөнхбат, Засаг дарга С.Батжаргал, Засаг даргын орлогч А.Түвшинжаргал нар иргэддээ гэр авах батламжыг нь гардууллаа.
СЭТГЭГДЛҮҮД /0/