Энэ сараас багш, эмч нарын цалинг нэмж буй. Үүнтэй холбоотойгоор  сургууль, цэцэрлэгийн эмч нарын цалинг ч 30 хувиар нэмэхээр болжээ. 

Энэ талаар Боловсролын яамны Санхүү, хөрөнгө оруулалтын хэлтсийн дарга Э.Адьяасүрэн "Бодитоор нэмэгдэх үү гэсэн эргэлзээ хүмүүсийн дунд байгаа. ЕБС-ийн багшийн гарт олгох цалингийн хэмжээ 700-900 мянган төгрөгөөр нэмэгдэх нөхцөл бий болсон. Үндсэн цалингийн хэмжээ 50 хувь нэмэгдэнэ. Нэмэгдэл нь үндсэн цалингаа дагаад өснө. Мөн орон нутгийн нэмэгдэл, удаан жил ажилласан нэмэгдлийн хувьд, өмнөх цалингийн хэмжээгээр бодогдоно. Салбарын цалингийн сан гэж байгаа. Манайд 93 мянган албан хаагч ажиллаж байгаа. Багшаас гадна ажилчдын цалин ч нэмэгдэнэ. Нийт 3.3 тэрбум төгрөг зарцуулах төсөв батлагдсан. Бид төсөвтөө багтааж ажиллах үүрэгтэй. Манай салбарт 1300 орчим эмч, шинжлэх ухааны 100 гаруй албан хаагч бий. Шинжлэх ухааны албан хаагчдын цалингийн хэмжээг Эдийн засаг, хөгжлийн сайд, эмч нарын цалингийн хэмжээг Эрүүл мэндийн сайд тогтоохоор болсон" гэв.